Nordklang – Kórahátíð Norðurlandanna

Kórahátíðin Nordklang er haldin á þriggja ára fresti og í sumar verður hún í fyrsta sinn á Íslandi, 29. júní – 3. júlí. Landssamband blandaðra kóra ásamt Félagi íslenskra kórstjóra skipuleggja hátíðina.

Hátíðin fer fram í Háskólanum í Reykjavík og lokatónleikar verða í Eldborg í Hörpu.

Boðið verður upp á 9 vinnusmiðjur með mismunandi þemum og geta bæði einstaklingar og heilir kórar tekið þátt. Kórstjórar í fremstu röð frá öllum Norðurlöndunum stýra vinnusmiðjunum þar sem unnið verður með fjölbreytta og spennandi tónlist. Alla daga verða hádegis- og kvöldtónleikar með ýmsum kórum, samsöngur og að lokum sýna vinnusmiðjuhóparnir afrakstur sinn á lokatónleikum.

Þátttakendur komast í tæri við ýmsar tegundir kórsöngs, svo sem rytmískan, klassískan, þjóðlagatónlist, spuna og fleira. Vinnusmiðjunum er ætlað að höfða til þátttakenda af öllum kynjum og aldri með fjölbreytt áhugamál.

Nordklang hátíðin veitir nýja þekkingu og innblástur og eru öll áhugasöm um kórsöng hvött til að taka þátt.

Facebook: https://www.facebook.com/nordklangchoralfestival

Heimasíða: https://nordklang.nordklangkorfestival.org/